Chalo ab maan jao tum, bahot anmol si gharian

Chalo ab maan jao tum
bahot anmol si gharian
bahot nayab se lamhey
sitamgar waqt k panjey mein

Aa kar kho gaye hum se

bahot ziddi agar ho tum
tou hum bhi hein bahot khud'sar
magar ik baat batla'on
bicharr k hum ne kiya paya

teri khushian juda tum se
mere sapney khafa mujh se
teri raatein bhi sadiyon si
mere bhi din nahi kat'tey

chalo ik pal ko sochein hum
k in sab ra'igan baaton se
aakhir kiya mila hum ko
chalo ab maan jao tum

tera joban ye mujh se hy
mera jeevan ye tujh se hy
teri muskaan mujh se hy
mera har maan tujh se hy

chalo ab maan jao tum
mere bin tum adhoory ho
tere bin main adhoora houn